i'm your friend

愛在地球毀滅時 (置頂)

2008-07-17T23:53:00.000+08:00

天文台台長話，市民長時間使用冷氣，浪費水資源，加上高樓林立阻擋地面散熱速度，種種因素令香港四十年後冬天不再來，正式同曼谷、新加坡睇齊。我覺得，呢D又係人類典型o既自作孽，不可活。

xxxxxx

記得幼時寄居大埔鄉村，四季分別尤其明顯。中秋過後我已經要著棉襖保暖，冬天就更加唔使講，要長期化身人肉裏蒸稯續命。唔同o依家，中秋節重成三十度，流住汗食月餅。而當年夏天，亦無今時今日o個種悶熱，因為，周圍o既龍眼樹同蕉林發揮o左吸熱作用，令炎夏時間唔似依家咁難過。我讀書唔多，唔識用高深o既道理去解釋大自然o既奧妙，只係覺得，云云眾生其實係要互相依賴，任何一方獨大，最後只會招來毀滅。但不幸地，自居為萬物之靈o既我地正不斷試緊大自然o既底線：樹木狂斬、高樓狂起、冷氣狂開。香港正全速向成為赤道中心地帶o既目標進發，個人估計，再過十年大家已經無機會著大褸、棉衲拜年，雞翼袖孖煙囱將會成為過年指定衣著；而一到夏天，新聞頭條會係「最新熱死人數速遞」，傳媒為市民報數，睇o下每日有幾多人因酷熱天氣而斃命；戶外活動將成為高危動作，大家離開室內範圍前要用生活易同政府簽定生死狀，保障政府免受刑責。過度o既城市化令大自然對調節環境有心無力，無o左佢o既幫助，地球毀滅論，o係廿一世紀再唔係天方夜譚。我深信人類已經有足夠o既條件去實現呢個終極目標。一鑊熟。

xxxxxx

我唔想將自己塑造為聖人、環保鬥士。冷氣，我經常有開。有時亦會因天氣炎熱而多沖幾次涼，浪費左珍貴既水資源。但，聽到台長呢番話之後，我想改。雖然，回頭或已太遲，但我仍然想盡改。琴晚開始，我將開冷氣o既時間減少一個鐘，改為用電風扇乘涼至十點，將近訓覺先開冷氣。雖然，區區一小時幫唔到D乜，但我希望自己能夠慢慢習慣無冷氣既日子，再將開冷氣o既時間慢慢縮短。我明白，只有我一個人去做呢D動作，唔會改變到香港或者地球既命運，但多一個總好過少一個。如果，閣下有緣路過此blog，亦唔嫌棄blog主文筆垃圾，花兩分種睇睇呢篇「blog主心聲」而肯參與「拯救」(其實用「補鑊」呢個詞語會更貼切)環境的話，我會萬分感激。我相信，改變個人生活習慣會比捐錢俾環保組織更有效減少對大自然o既傷害，亦更有意義。就當係做小小對環境有益o既野令自己感覺良好，可以嗎？

上海，上海

2008-02-02T00:12:00.000+08:00

最近朋友圈之間突然捲起一股上海熱，不論男女老幼都係毫無先兆下到當地長駐工作。現實人耳仔軟，經唔起朋友們半游說半炫耀性質既邀請，相隔兩年，上星期特登再去個邊睇下咩環境，嘗試了解當地市道同工作機會，等第時真係要著草既話都可以多個選擇。

xxxxxx

其實，現實人長遠都唔敢睇好香港前景。畢竟國家政策不斷咁變，港商前舖後廠既經營方式已經越來越困難。廣東省成本飛漲、內地出口政策越加開放、人仔升值、同胞工作能力不斷提高，種種因素都令香港優勢越黎越細。坦白講，除左金融同地產之外，我睇唔到香港其他行業係重有好大好大既進步/生存空間。好似現實人呢D無相關專業資格，高不成低不就既普通市民，係香港繼續發展事業既前境並唔會好得過低技術勞工。所以，近呢2年現實人一直有往大陸闖既念頭，可惜永遠都係講多過做，流於假大空。但基於07年下半年香港貿易行業漸漸吹起既淡風，現實人往外闖既決心又再加強。因為，現實人感覺香港既經濟勢頭越黎越唔對路，並唔似政府講既咁一片昇平。唔走，可能會中伏。所以，趁有空檔兼被包食宿既情況下決定北上探探路。

xxxxxx

今次去上海，雖然撞正百年一遇既雪災，但惡劣既天氣依然掩蓋唔到當地市道既繁盛景象。新天地，淮海中路個D俾遊客睇既樣辦地方唔講，就算係長樂路，徐家匯，浦東正大廣場呢D算係俾當地人購物消費既地方都真係好旺，而且賣既野價錢同香港絕對有得比。現實人感覺上海市民既消費能力同數據顯示出黎所謂既人均GDP有出入........佢地應該比表面更有錢。同大陸人做生意既朋友應該知道，佢地有好多「特別渠道」搵外快，呢D外快唔見得光之餘又無辦法計落數據到，其實，大陸經濟暢旺呢D錢絕對應記一功，無呢D地下錢根本無可能支撐到目前咁旺既零售市道。當然，有地膽話我知，其實當地好多後生仔都係個種搵四千蚊但捨得碌卡買四千蚊一對鞋既鱷魚頭之流。但至少佢地敢洗錢，證明呢班人對前境係有絕對信心，相信之後自己會搵得返呢個數，好事也。

xxxxxx

另外，上海依家既國際化同香港比絕對唔失禮。基本上香港有既野，個邊都唔會缺少。而香港無既野，佢地又會有(現實人比較欣賞上海的士既roadshow touchscreen版，夠informative之餘sell既野又夠廣泛, 由普通商品到文娛活動到clubbing event都有，真係好有用而且吸引到人去睇)。雖然現實人知道妄自菲薄係唔好，但撫心自問，唔考慮政治因素既話，單從地緣同人力資源角度去睇兩地未來，上海係發展上超越香港只會係遲早既事............悲觀D睇，可能十五年後香港已經會完全被比下去。:(

xxxxxx

誇張少少咁去講，現實人身邊幾位工作能力好不俗既朋友都相繼去左外邊工作，即係等如香港少左精壯兼有質素既勞動人口留係自己地方發展。而隨著大陸越黎越多發圍機會，我相信人才流失情況只會惡化唔會改善。基於呢個睇法，香港既前境究竟會點，現實人真係唔敢講。唯有縮骨D講句，大家自求多福，有得出去闖而又無乜顧慮既話就好去囉........

唉

2007-12-27T23:20:00.000+08:00

近兩個月貪錢病發作，身兼兩職，捱到金睛火眼既同時又有好多苦水想吐，奈何得閒死唔得閒病，實在未有時間撚篇鳴冤狀出黎。

百年一遇的〈自瀆〉天才

2007-11-13T22:38:00.000+08:00

阿叔...........好心你幾廿歲人就打少陣飛機。我知你經濟學好叻，佃農理論好勁。。。但都係咸豐年代o既事啦。係掂o既晨早就拿o左諾貝爾獎，使乜成日要曬自己識邊個邊個經濟學巨匠叨人光自抬身價？真係咁頂天立地o既，做乜依家搞到有家歸不得，要匿o係大陸對鏡自瀆？講到自己十項全能，點解外間從來無對你其他能力作肯定？

xxxxxx

借人家地盤〈長期〉誇讚自己等同呃稿費無異，編輯部，點搞呀？今期又o黎料話自己料事如神N年前已經估計到人民幣點點點，馬後炮過財經演員。編輯部，Cut o左條飛機友個專欄啦。射到一地都係拖低晒份雜誌o既水平呀。

榛子回魂

2007-10-27T22:53:00.000+08:00

現實人蓄長髮已經有好幾年時間。無他，對上2x年人生都遵守長輩遺訓：族中子弟可留skinhead者都需留之，所以現實人對上一輩頭頂清爽者眾，要幾剛陽有幾剛陽。2x歲前，現實人依然以為頭毛恥毛係一家親，可以同自己廝守終生直到入土為安，所以一直都安身立命僅遵老祖遺訓，勤力剃毛毛以免過長。但身處資訊越黎越多令人反胃o既香港，每逢翻開報紙雜誌，總會發現平均隔3.8頁就會見到大大小小鬼五馬六但又殊途同歸o既織髮生髮防脫髮廣告，呢一刻，現實人先知道，原來頭頂D毛，同臭氧層一樣，只會越o黎越薄。OK，如果唔o係「有買趁手」之時好好玩下呢堆俾生髮公司形容為「性徵」o既呢堆毛毛，係咪會好後悔先？所以，現實人係3、4年前開始違背老祖宗遺訓，成為「劉長發」。

xxxxxx

當然，現實人成為「叛徒」初期受到親友大舉圍剿係無可避免，雖然早知結果如此，但感覺依然難頂。好彩親友們絕大部份都係陀地，有住香港人典型o既「三分鐘熱度」性格，時間一耐o左就習慣面對「劉長發」。三姑六婆收口o既結果，唔使講都知係「肆無忌憚」地試新o野啦。呢幾年間，現實人頭髮越黎越長，花款越o黎越多。瘋狂地每隔兩三個月就轉一轉髮型，就好似要將以前失去o既通通一舖拿晒返o黎咁。

xxxxxx

如是者o黎到2007，今日現實人如常去相熟髮廊清理頭毛。洗好頭琼乾水等俾師傅「搞」o既時候，突然靈光一閃，想知道如果依家變返以前o既現實人，做返對得住祖宗o既「好男兒」，各新知舊雨會點睇自己。做好思想準備後就叫師傅手起刀落，幫現實人設計一個唔好太樣衰o既陸軍裝。落髮需時，由長變短前後都花o左個半鐘。幾年o黎o既自我感覺良好歲月，o係07年10月27日，終於暫時結束。

xxxxxx

五點，現實人依然係「劉長發」；六點半，已經變成另一個人，名為「陸均莊」。而且，重係一個頭型似榛子o既「陸均莊」。

xxxxxx

榛子男，正式回魂...................................一個月。真係有少少後悔。

啟事一則：

邊位大哥咁俾面，抄我o個句「普選餓死我細路」放o係一大押？下次，開一開名好喎。須知道「無名氏」隨時搞到現實人做替死鬼俾人以為我周圍便溺污染環境喎。

帶我看齣戲

2007-10-13T09:54:00.000+08:00

鐘偉民「狼的心」專欄10月12日如此寫道：

“有一個女人，在天星碼頭的篷頂跳來跳去，跳出一點知名度，就去競選了；碼頭，原來只是一座臨時舞台，讓一幫又一幫投機者，免場租演出一幕又一幕馬騮戲。總覺得「保育人士」就像雪糕車，公義與否，真是見仁見智。”

有人話鐘偉民偏激兼喜歡人身攻擊。但我鐘意。今日呢隻為「保育」連工都唔做，周圍R爛腳叫人贊助自己個女讀國際學校o既跳樑綜援小「醜」都可以打住「給市民多一個選擇」出o黎抽水增加知名度，聽日會唔會連o個個不男不女，名叫「阿草」o既雙失「保育」衛士都話要喚醒市民對本土文化o既認知而走出黎同3個師奶趁墟，滿足佢見報出位o既願望？

xxxxxx

又，用第二個角度去睇呢套爛過三色台出品o既肥皂劇，如果真係爆出九十九倍波膽俾跳樑綜援小「醜」贏左呢場鬧劇，咁，就算香港去到2046都唔值得有民主棍日吹夜吹能醫百病o既2012雙普選囉。

xxxxxx

universal suffrage won't feed my children.

誰命我名字

2007-10-03T14:30:00.000+08:00

曾經何時，康講男俾朋友叫做「現實人」，意謂小弟擁有飄移級轉呔技術，對某人態度可以係五時花六時變，今日重係「老朋」，第二日已經唔識人。康講男花o左好幾年先改到呢個令人臭朵o既壞習慣，「現實人」惡名亦已煙消雲散o左一段日子。但依家潮流興復古，興身份認同，康講男決定為「現實人」平反。o係呢個人情日益薄過臭氧層o既「國際都會」入面生活，做人現實d，其實都無壞，反正扮清高會俾人話on鳩。態度騎牆d，反而有機會搏拍掌搏影相。死未？

所以，從今天起，「現實人」正式復出。

大城小事

2007-10-02T22:23:00.000+08:00

由幾條短而整齊的街道組成的這個安靜的小區，有著不同的小店，每間小店都由附近街坊經營，雖然裝潢與售賣的貨品款式和市區的商舖相去甚遠，但每位老闆和員工對鄰里的體貼卻是市區者所不能相比的。所以，我喜歡這裡。喜歡這裡濃烈的人情味，喜歡這裡晚上清幽的環境，還有喜歡那一點點兒時生活的回憶。常言道「景物依舊，人面全非」，但這安靜的小區卻仍住著幾個我熟悉的臉孔：

健談有禮的單車店老闆，和十多年前相比雖然體態沒變，標準依然，但他那灰白的髮鬢還是印證了歲月的流逝。單車店亦從以前小區內首屈一指，長期擠滿「街車少年」的新潮聚腳地蛻變為今天為廣大主婦維修「買菜車」和手推車，偶然有中年大叔到訪閒聊過日子，不再忙碌的老店。街車時代的老早就過去了，同時亦代表單車店的高峰一去不返。人流少了，生意少了，但老闆的人情味卻分毫不減。只要你有疑難，不管有生意與否，老闆仍是會很客氣的跟你解釋一番。這亦是我堅持繼續光顧這家老店的一個重要原因。當然，我和其他人一樣，早已捨棄了那曾幾何時讓人感到神氣的街車了。

在單車店的對面，是維修電單車的車房。車房飼養的那頭大狗，我想至少有七，八歲大了。記得以前每走過那邊都會自動繞路而行，因大狗實在恐怖。那裡的員工還是那幾位，其中有一個是和我同村的舊鄰居。不過事隔多年，大家相見雖相識但亦已形同陌路。是的，彼此都不是以前乳臭未乾的牛屎仔了。

舊人雖好，仍需新人加入，一個社區才能顯得有活力。在小區的內街的中式餐館，主理的陽光兄妹外型討人喜歡。食物水準或許有點砂石，定價亦有改進空間，但至少，他們的待客態度令我很喜歡在那邊打躉，雖然，我不太喜歡他們的客氣菜式；食店側就有一家老牌石油氣店，負責送貨的廿一世紀少年亦夠好玩。還記得他第一句跟我搭訕的是「我叫的飯可以送過來未？」，把身份為食客的我強行變成兼職企堂，異常好玩。其實，在這個地方，值得寫的人物還有很多，樓上快閃阿婆、興邦好戲頑童、糖廠愛心咕喱、後巷花斑細貓、異國斷背情侶...............每個角色加起來，就是我最愛看的風景。

雖然肉麻，但我仍然要說，我愛小區。

永遠等待

2007-09-27T23:38:00.001+08:00

想像一下，如果人生中有近三份一時間被軟禁，陪伴自己o既只有一台爛o左彈唔到o既鋼琴同一d被過濾o既報章，對外通訊幾近隔絕，無家人無朋友無自由，獨守空房，呢二十年人生你會點過？會堅持到底定係自絕人世？

xxxxxx

又如果，對頭人肯「賜予」你一個重獲自由機會，但要你放棄自己無私o既理想作「等價交換」，而呢個機遇係俾你見彌留至親o既最後一次機會，你，又會點選擇？

xxxxxx

相信大部份平凡人如我，都會毫不猶疑從自身角度出發去作出「對得住」自己o既抉擇，o係私心同正義之間選擇前者。畢竟一時o既私心換黎o既可以係終生o既解脫／自由，而且o係同至愛生離死別o既人生交叉點前面，講「大義」講「理想」o既空間根本唔多。但，外表脆弱o既昂山素姬選擇放棄個人福祉而堅持繼續為自己o既民族爭取應有o既權利。

xxxxxx

緬甸同我，風馬牛不相及，o個邊就算點樣水深火熱，o係香港o既我日子一樣咁過：錢照搵街照去歌照聽，緬甸人係生係死，政府如何獨裁專橫揮霍無度，一一與我無關痛癢。雖然同緬甸唔係姣婆遇著脂粉客般過電，但，我仍然真心仰慕彼邦o既昂山素姬。佢對自己民族無私o既奉獻感動o左我呢個無膽speak out o既閒人。有關佢o既一切消息都令我牽腸掛肚。雖然，我同佢唔同種族，佢爭取o既亦對我無直接益處，但，我o既心仍然與佢同在。因為，昂山正在做o既，係香港一班所謂「政治家」實則政棍唔敢亦無諗過做o既真正大事，一d我o係香港無機會見識到，可以改變世界o既大事。心痛o既係，佢行o既係一條極其艱辛而且未必有盡頭o既不歸路，一條已經行o左將近二十年但越行越窄，雖然見到曙光但光芒好可能再次一閃即逝o既苦路。

xxxxxx

據報，由於軍政府怕昂山素姬影響力令局勢加速惡化，已經先發制人地將佢由寓所轉送至永盛監獄接受更嚴密o既監控。近二十年o既非暴力抗爭，換黎o既係幾近毫無進展o既歲月蹉跎，昂山素姬理想中o既緬甸，難道只能停留o係「永遠等待」o既死胡同入面？

信不信由你

2007-09-24T10:35:00.000+08:00

年頭師傅話，講男今年運勢係「水漲船高」，公司好，講男好。搵到食之餘桃花亦旺，當時開心到講男想即場叩三個響頭俾師傅佢老人家，多謝佢o既神機妙算。因為，根據之前經驗，師傅準繩度無容置疑，所以，講男今年一定得！

xxxxxx

OK，依家一年將盡(10月將至，當多除少補計)，我又嘗試幫呢條糊塗帳埋單計數：

1) 工作：公司係擴充左，o係第二個地方「合法插旗」，叫做去到第二個層次。但，講男並沒有隨今次「水漲」而搵得更多，反而收入大倒退而要提早發出「盈利預警」：今年要為私生活進行瘦身，怒減不必要應酬同裝身成本。死因報告指出，講男收入大插水原因主要係三個大客中有兩個早於年頭已fucked up，加上今年市場異常gloomy，就算講男出埋飲奶力都只維持到去年同期既六成生意額。換句話說，今年用「水浸眼眉」o黎形容講男o既處境最為合適不過。

2) 桃花：原來預測為二揀一，到今年為止，除o左一個講男自己係跟進過程中中途跳船外，暫未有其他「可持續發展」目標。同往年一樣，中空寶。師傅，我要殺死你！！！

3) 整體運程：運勢應比舊年差，至少今年身體經常受創。琴日係07年第三度發生交通意外。事緣於林錦公路踩車落斜時，被一失魂假日司機突然抽頭U-Turn所累，成為空中飛人手部受創，「坐騎」組件幾近報銷。不幸中之大幸係o係意外中無傷到頭部(話時話，講男同失魂車相撞後，成個人飛o左去擋風玻璃再碌落地度，姿勢分拿晒，電影感十足)，但同時失魂魚經警察調停後只肯負責三份二單車維修費用，令講男又要自己硬掘幾舊出o黎幫補。係呢D褲頭緊過護陰o既日子，呢D錢真係跌得非常無謂。如果咁o既運程都算「水漲船高」o既話，我聽日就搵人送塊「料事如神」牌匾俾師傅敬賀！

xxxxxx

所以話，師傅都有失手時，非精密科學者，信不信由你。

我會選擇「師」

2007-09-10T13:12:00.000+08:00

想一得二，有得出去跑時覺得辛苦，有機過朝九晚六白領生活時又覺得悶，康講男就係一個如此矛盾o既勞動人口。呢件蛋散，想法五時花六時變，諗頭無限但落實者有限，大部份工作時間都o係自我腦震蕩中度過，生產力/貢獻度比清潔阿姐重要低幾個level。簡單D講，康講男絕對係冗員一名。能o係職場生存至今時今日，全賴鱷魚頭老襯底擺靚行頭「大」到對手，贏到人面個「浸」方能苟且偷生到廿一世紀。

xxxxxx

由於知道自己實力學歷兼缺，康講男一直唔認為自己單靠面個「浸」可以係職場捱到人生盡頭。讀書條慧根又俾一種名叫「懶蟲」o既神秘生物嗒左，致令講男徹底同學校絕緣，通往社會上層的楷梯都消失埋。由此可見，「懶蟲」呢種生物o係草根階層入面係幾咁可怕。一經此猛禽襲擊，註定貧窮偏偏選中你。

xxxxxx

雖然康講男從未諗過做貴族，亦非常樂意做爛泥任由其他冒牌blue blood踐踏，但，作為中堅草根分子，講男都會擔心年紀再大少少，洗完面o個「浸」，人工又比D新入行青頭為高，「地主」算過度過後認為養講男無著數而被怒「雞」，然後三餐不繼，晚晚要o係樓下垃圾桶打躉等開餐，將別人餘唾循環再用，將環保推向另一層次，過一D非人o既中坑生活。如果，呢個真係康講男o既未來，咁呢個事實實在比知道越o黎越多女仔打「假波」更灰。

xxxxxxx

唔想食垃圾，但讀書條慧根又俾「懶蟲」擔o左去，講男要增值自己，點算？見到隔離屋PCC「Dup」上門set野行師徒制，老鬼將一門門手藝傳俾旁邊o個位貌似「毒男」o既小朋友，靈光一閃，康講男決定反其道而行，將其他人睇o黎已經out晒o既舊路再行一次，拜師學藝，工餘學返樣老土手作仔傍身，咁樣就算第時打回原形做一個老襯4.0，都重有一兩下散手搵餐晏過日晨。究竟講男學D乜? 有機會下回分解。

門是關了，但窗口仍然打開

2007-09-09T22:35:00.000+08:00

康講男自十七歲開始就一直夢想住唐樓，貪佢間隔實用樓底高兼易同鄰居打成一遍。奮戰八年，目標總算o係今年實現o左，叫做還了自己一個小小心願。

xxxxxx

可惜康講男千算萬算，就係低估o左現居被前面幾楝私人樓阻擋o左帶o黎o既影響。政府話，屏風樓影響通風o既理據重未被證實，但講男一定支持呢個理論，因為，小弟正深受其害。實情係，現居僅有可以開o既三扇窗全部面向對面樓廚房，硬食油煙尚算等閒，最悲哀係呢幾楝廿幾層高o既「新款唐樓」完美地攔截所有自來風，令康講男呢個單位同籠屋無乜分別。冬暖夏熱。除o左打風落雨o個幾日，基本上間屋都係處於無風狀態。蒸籠一個。雖然情況實在惡劣，但講男實在唔想多作孽同破壞自己o既承諾，所以就算假日身處煉獄都唔想太早開冷氣，堅持每晚10點以後先o黎個大解放。日間唯有開行風扇希望間屋「生」D，但一把風扇仔實在好難起到乜o野作用，基本上康講男仍然要忍受生蒸之苦。

xxxxxx

熱，其實一D都唔可怕，講男其實最怕焗。因為，每次身處空氣唔流通o既環境講男都會發生頭痛問題。呢種類似偏頭痛o既痛症，食多多止痛藥都無用，每次都要扣喉嘔吐先可以抒緩到頭楚，令人感覺非常犯賤而且痛苦。自搬入新居三個月來，頭痛情況越見頻密，呢樣o野並唔係講男所期待o既獨居生活o既其中一環細節，可惜「佢」佔戲越黎越重，絕對有把講男自我感覺良好o既唐樓生活「KO」之勢。

xxxxxx

無論如何，講男從嘔吐痛苦中捱過今年炎夏，但，面對出年或會更熱更焗o既6, 7, 8月，我feel到，自己隨時有機會見報........................係咪要安定平安鐘呢?

Femme Fatale

2007-09-03T22:14:00.000+08:00

近來康講男情緒起伏拍得住8/17大奇蹟日，雖然，有好多好多說話想講，但講得私事太多又怕自己會成為o個班將問卷調查結果奉若神明o既學者口中所講唔識o係網上保護私隱o既「青少年」，而且正在學習點樣將面對生老病死時o既EQ提高，寫太多傷春悲秋o野對自身無乜助力，又容易令人覺得康講男扮晒傷文藝憂鬱小生，所以，康講男決定今晚o係度同大家想當年。

xxxxxx

康講男個性比較老土，對舊野特別有興趣。記得讀書o個陣已經好迷60's/70's野，覺得o個陣時D band/人玩o既音樂最raw最有實驗性，唔同依家D樂隊，o係studio用電腦執到D聲0瑕疪，係好好聽但失晒真。jimi hendrix, the doors, deep purple, the rolling stones.....一大堆神枱band康講男都有幸聽過o下。當中講男覺得實驗性最強橫最「迷」o既樂隊，簡稱VU o既 The Velvet Underground肯定當之無愧。由迷幻老祖Lou Reed做大佬o既VU，當年玩o既音樂，其實驗性係之後三十年o既樂隊都無法比擬。其第一隻大碟《The Velvet Underground and Nico》o既前瞻性，就算今時今日聽返都覺得佢地好癲。不過港男並唔係想講VU有幾迷幻幾前衛，而係想講俾佢地一碟過後怒撇o既六十年代著名「老同」Nico。

xxxxxx

康講男覺得，六十年代歐洲出產，又索又識玩下音樂o既女明星真係數極都有。英國有marianne faithfull(另一著名巨乳「老同」，小弟最愛60's icon之一。係米積加普渡之下成功升仙，代價係俾積Sir趙完鬆，現居法國，半退休狀態)，法國有anna karina、jane birkin，德國就有個nico。位位都有相當食力，靚得o黎唔係得個殼。可惜當時正值hippie風氣盛行，呢班「才藝小姐」唔係鐘意上電就係隨便同人打友誼波，搞喎左個朵，事業又上唔到最頂。當然，係sub-culture黎講，呢班人梗係上晒神枱俾人當黃大仙咁拜啦。D生活咁型。

xxxxxx

好老實，德國Nico 並唔係講男o個杯茶。因為，佢無乜肉地(!)。而且個樣太「老同」，係街離遠見到都要調頭走o個隻。但無可否認o既係，o係音樂認知上面佢比同期任何一個女藝人都要前衛。俗D o黎講即係「有格」。講男覺得，佢身上/音樂上發出黎o既邪氣除左係因為佢o既毒癮造成之外，主要係因為佢慘慘地既身世：自己一出世就欠缺父愛、13歲就單獨出ｏ黎闖天下，成年後，俾阿倫狄龍搞大肚，幫人生o左個仔被賴帳、事業上面o既setback，種種黑仔因素令到佢成隻feel都係冷冷冰。縱使五官幾靚但總令人有D望而生畏，望多兩眼要閃o既感覺。所以，雖然Nico比較有格，講男杯茶始終都係相對地人靚聲甜兼有肉地既marianne faithfull。

xxxxxx

最近，港男條60's癮又出返o黎，將屋企有o既碟都翻聽o左一次。雖然，有聲無畫，但一樣好Feel。而無畫呢個問題，係有youtube o既世代，已經唔係乜野問題。好彩地係o個度搵到Nico死前幾年玩o既一個underground show o既video clip，片中Nico已過不惑之年，美艷當然講唔上，但以一個四十幾歲兼迷上癮超過廿年o既人o黎講，化一個淡妝已經出得o黎見人，都算係得天獨厚。係個show入面，好明顯Nico係上足電先上台：瞳孔放大，眼球突出，加上咬字不清，成段片瀰漫住一種真真正正o既underground o既異樣氣氛。當晚，我被Nico o既表現嚇到失眠，訓唔著。佢上完電個樣，俾我o係上海街見到o既現代老同更令人心寒。可能，係因為知道佢既經歷先令講男更加「畏懼」Nico。

xxxxxx

康講男覺得，就算依家o既藝人點放蕩糜爛都好，佢地永遠都去唔到Nico o既傳奇位置。正如radiohead點強都好，樂迷始終都會覺得VU/Pink Floyd先係indie界影響最深遠o既樂隊。Nico o既一生，本身就係悲劇，加上環繞係佢身邊既伙伴都係「有今生無來世」之輩(Andy Warhol、Brian Jones、Serge Gainsbourg....and more)，同埋六七十年代各式各樣o既movements造成o既大時代、自身o既才華，種種因素都令呢個已經作古接近廿年o既女藝人仍然o係樂迷心目中有一個當代人無法逾越o既位置。雖然，康講男唔太鐘意音樂人經常glorify毒品o既效用，但的確，無drugs addiction o既話，講男相信六七十年代o既音樂史會被大大改寫。經典，好多時都係由悲劇產生。六七十年代o既音樂人悲劇往往由OD而起。Nico，只不過音樂史上面其中一個「悲劇過客」，一個值得令人緬懷o既過客。

xxxxxx

N.B. 港男電腦技術極速退化，幾年間已經唔記得點樣整hyper link。有興趣睇Nico迷幻表演o既可以o係youtube搜尋器打入'Nico Femme Fatale' 或者 'For Tomorrow's Parties, Heroes'等，自有斬獲。不過，康講男奉勸細膽如我者，晚上勿看。搞到你失眠就無謂。

前程錦繡

2007-08-15T23:10:00.000+08:00

計落，同S已經識o左十三四年。重記得，剛搬到新落成o既屋村，籃球場(康講男讀o既小學係細到容不下籃球架，枉論有球場！)，屋村商場，所有o野都對當時o既我好新奇，十足大鄉里出城。不過，雖然有新屋住，但以前o係鄉村o既朋友就一下子無晒，初時康講男都有少少灰。好彩，講緊成屋村o既人都係新埋班，只要肯踏出第一步，落街射o下波hea o下，好容易就認識到一班同樣係新搬入o黎未有著落o既迷途小羔羊。同S & co's呢班朋友o既認識經過，同老土勵志電視劇劇情差唔遠，都係先由球場競爭對手變為惺惺相識波友咁上下啦，差在無變斷背者。話咁快，咁就過左十幾年咯。

xxxxxx

講返S。佢來自單親家庭，而康講男屋企經濟狀況又一般，種種原因令大家算係o係圈子中較為早熟o既一群，所以自細都會同S講o下私事，交o下心。雖然，依家已經好少聚埋一齊打波，但每隔一段時間大家都會約出o黎見見面傾o下計。

xxxxxx

S一直都好識理財。而且好勤力。唔同一般單親家庭故事，S唔單止無學壞，而且好識把握每一個機會搵錢。讀書時期已經密密做：書展兼職，早上派雜誌，跟車送貨，拆櫃。只要可以賺錢，S都會不辭勞苦密食當三番。就算畢o左業出黎做野，呢個密密做習慣始終都無變過。記得S同我講過，佢o地一家唔想伸手求「無賴人」施捨，所以佢習慣乜都靠自己賺返o黎，唔會求人。呢種性格，令康講男某程度上好尊敬呢個同齡o既朋友。

xxxxxx

最近，得知S終於遇到機會，獲邀入股做小老闆。作為朋友實在好戥佢高興。S之前辛苦儲下o既人脈同資金今次總算能派上用場，雖然入股唔等於一定成功，但至少可以有機會去闖去試。趁後生「拼一把」，兼唔使辭去正職，點計，都係nothing to lose。希望佢今次可以乘勢而起，將以前無既一次過拿返o黎。康講男呢個周一真係好開心，亦非常期待下個月去撐場o既大日子。S，你真係掂！

時光，是對的沒說謊。

2007-08-07T23:00:00.000+08:00

記得細個住o係大埔鄉郊o既時候，其中一樣最期待o既事物就係不定期到訪蔽村o既雪糕車。十幾年前o既大埔，就算講緊o既係最旺o既舊墟，便利店都唔太多，要o係鄉下地方食軟雪榚就更加無可能。所以，每次雪糕車o既到訪，自己都特別興奮，畢竟當時真係比較少機會食到又香又滑既軟雪糕。

xxxxxx

尤記得每當聽到o係山腳傳來o既富豪雪糕車強勁o既招牌音樂時，住o係山腰o既我就會死「Ler」當時身手尚算靈活o既母親大人醒一個幾毫俾自己，等我可以跑落去買軟雪糕。當然，作為孻仔，幫大哥做跑腿已經係老馮動作，一人要買兩份。不過細細個o個陣我已經知道「抽佣」o既重要性，大哥o個份，係運送途中已經俾我抽o左少少水。人細鬼大，返到屋企重識厚住臉皮對大哥吹水話D雪糕溶o左少少，所以形狀有少少走樣。可憐大哥俾細佬食o左頭圍都唔知，重以為坐係度有得食，飯來張口好舒服，哈哈。

xxxxxx

一個人搬o左出黎住，離自己o既故里近左好多，所以間唔中都會踩夜車入去緬懷下以前o既日子。十年人事，大部份o既平房已經被清拆，以前成日落去捉魚仔o既小河亦被填平，蕉林、龍眼樹亦難逃一劫，取而代之係一楝楝密麻麻o既三層式村屋。村屋設計靚唔靚就見人見智，小弟淨係覺得，周圍樹都唔多棵，重要每楝密質質痴埋一齊，感覺異常擠迫，咁o既村屋我寧願住返樓好過。故居四周已面目全非，唯獨有一樣o野令小弟驚喜o既係，今晚「出巡」期間竟然o係故里重遇雪糕車。富豪雪糕車，依家已經買少見少，唔知係口味選擇太少定還是香港寸金尺土，容不下呢D拍o係路邊阻住地球轉o既古董做生意。總之，就係越黎越少見。今晚俾我o係故里重遇佢，重要泊o係同以前一樣既位置，雖然我知道夜晚食雪糕會肥，但都係忍唔住買一個(條?杯?筒?)軟雪糕懷念下往日o既乜都唔使擔憂o既鄉村生活。眨下眼，就過o左十幾年，我都由昨日o既青靚白淨小郎君，變成今日滿臉鬚根，過住每日擔心有無數返，異常唏噓既麻甩仔。所有o野都係不停咁變，唯一無變o既，就係富豪軟雪糕o既味道，同埋，自己對呢個地方o既感情。

xxxxxx

...........好老土。

我真的受傷了

2007-07-31T23:01:00.001+08:00

每日都無好新聞。一家九口，兩位老人家加六個半新移民，棄守汕頭鄉間寬敞村屋，為了貫徹生為大陸人，死做香港鬼之遠大志向，寧可殺出港島，窩居二百呎公屋，每晚表演室內叠羅漢，實行見步行步，同窮字鬥長命。錯有錯著，有遠大志向但落街無錢買麵包之大陸人們，某夜化身北韓飢民拾荒充飢，結果食物中毒榮登港聞頭條，終於光宗耀祖，成為最新紙上明星。翌日，大量愛心泛濫苦無出位機會之香港政界嘍囉紛紛伸出同情之手，做其跑腿加緊張羅，不消一星期，綜援大屋善款滾滾來，衣食，往後肯定無憂。一個所謂「見步行步」，無能力供養卻響應毛主席人多好辦事生夠五個，來港視察環境後毅然帶同妻小定居之「無計劃」之大陸人，聯同香港各界飽暖思淫慾，苦候出位機會之奇人異仕，大鑼大鼓上演一齣後現代千里奇遇結良緣。主人翁大團圓歡喜收場，張「標」，麻煩各日日朝九晚九，搵朝未得晚之香港土生土長居民幫幫手，拍心口找數。對著這些專走精面找著數之「大陸狗」。對，是大陸狗，我們，可以說甚麼呢？

xxxxxx

同一時間，偉大政府準備讓二百萬深圳居民自由進出香港。好事，真係好事。大家往後可以公然用二千至三千蚊賤價聘請清潔工或苦力或收買佬，無需提供住宿，反正伙記即日來回，扣除水腳，他們還是有賺。僱主又省回不少皮費，完全是「win-win雙贏」。可憐收開雙倍價錢之本地工人，對不起，香港是信奉市場經濟之地方，自己調整收費吧。賺到的不夠你生活？閣下自理。政府只關心二百萬人中有多少是豪客，對於蟻民如你，sorry，you are not even in my plan。錢不夠花也不要問我拿綜援，我們的綜援，只是給聰明的，懂走捷徑的大陸狗享用的，勤勞的本地人種還沒資格向我要錢！

xxxxxx

面對一個沒遠見，只懂奉承阿爺的小家政府和形形式式盡拿香港著數的賤種，我，真的受傷了。一個正不斷大陸化，非黑即白單元化的地方，有誰可以告訴我，這裡還是以前的那個香港嗎？

我找到了

2007-07-18T23:17:00.000+08:00

第一次搵到凍飲唔使加兩蚊o既cha chaan teng。油麻地大安茶冰廳，凍飲，只加一蚊。o係呢個世道，o係地下見到一蚊你都未必會執，但o係茶餐廳，二同一之間對客人如我分別可以好大。事緣,由識自己去茶記開餐之時我已經好唔明白，點解會有凍飲加兩蚊呢條咁o既「苛政」出籠，挾人客俾多兩皮，大佬乜D冰咁值錢o架咩？照計擺o左D冰落杯度，飲品份量應該重要少o左，點計都好，加兩蚊唔太對路噃。簡單D講，凍飲加一蚊定兩蚊其實係小事，俾多一蚊唔會搞到下餐飯無著落，講o黎都係為啖氣o者。只不過「加一」呢個動作真係幾貼心，同有D「撥亂反正」feel，所以我決定小事化大，寫出o黎分享o下。我堅持，凍飲加一蚊先至係王道！

xxxxxx

不過，雖然香港大部份茶記凍飲都係要加兩蚊，做客o既無得選擇，但我都係心甘命抵俾佢o地賺呢D老馮錢。因為，我真係太鐘意茶餐廳百搭，自成一格既食物！須知道，o係香港生活，原本就應該要似佢咁靈活多變o架啦。

舊碟新說《Liberation Transmission》

2007-07-17T23:03:00.000+08:00

近呢幾年，唔同類型o既美國音樂都係歐洲市場取得好大成功，black eyes peas, the strokes, the killers, linkin park, my chemical romance等一大堆樂隊，每逢出碟定必大賣。相反英倫樂隊反攻大西洋p既另一面成績就慘淡得多，數o黎數去較為成功o既應該只有coldplay同上一輩o既收音機頭及神枱級o既U2。某D音樂人為o左強攻花旗，甚至將自己唱歌o既口音都改做美式，希望多份親切感打入美國佬呢個大金鑛，可惜大部份都係失敗告終。美國市場，吸引得黎又真係幾封閉。

xxxxxx

威爾斯樂隊lostprophets，服裝同音樂上就真係抄足美國hardrock/nu metal o既band，至於唱腔，小弟英文唔好，聽唔出。雖然已經盡量同美國同化，但佢地係o個邊o既知名度就始終一般，最多人識o既應該只得一首《Last Train Home》，講緊係四年前o既single啦喎。去到舊年第三隻碟《Liberation Transmission》，就算lostprophets洗晒陣nu metal味，取而代之玩小小emo，小小hardrock, 小小ballad，炒雜錦咁做一隻嘈到拆天o既pop album, 但o係美國都係唔掂，無計。

xxxxxx

講返呢隻碟，水準真係好唔錯。簡單o黎講，入面乜都有D。情歌勵志歌純玩野歌通通不缺，旋律亦極易入耳。無o左以前o個陣nu metal味小弟覺得反而重好。記得上一隻碟《Start Something》，雖然全碟風格連貫，好好聽，但我始終對一首首heavy metal格局但無厘頭會有turntable聲o既歌感覺麻麻，通俗D形容，就好似去麥記食魚柳包食到入面有肥豬肉咁樣，唔知想點囉。都唔襯。《Liberation Transmission》雖然比前作少o左連貫性同型格，但音樂水準小弟覺得較平均。除o左愛隊manic street preachers同spiritualized外，好少有樂隊能夠令我翻聽再翻聽佢地o既作品而唔使skip track，lp呢隻碟就做得到。o黎到07年，我都未捨得擺佢入雪櫃。隻碟，weekend朝早爆機尤其爽，夠晒嘈夠晒正面呀。

xxxxxx

P.S.

1) 不過成隊人個look都好扮野。雖然，Ian Watkins係幾有型。但，都唔使咁作狀o架大佬D mv。

2) 上youtube睇過佢地o既live，水準真係旺角隔離。好多樂隊o係studio玩到識飛，一做現場即時露底。個人覺得lp一樣難逃此法則。而且，Ian哥係唔係都fuck......單靠呢個字搞氣氛唔掂喎。練o下D高音先啦。同album version比低左2個key呀。

3) 《Liberation Transmission》係一隻“Ultimate Pop Album”。

臭朵

2007-07-05T22:32:00.000+08:00

自從賭波合法化之後，香港報紙o既體育版標題同內容除左「馬經化」外，行文亦都活潑過以前好多。幫球員改花名o既創意比以前更強橫。記得以前阿叔幫西班牙迪拉彭拿改名做「小活佛」已經令球迷驚為天人，但個人覺得賭波合法化後蘋果同東方改花名o既功力更強。

xxxxxx

典型例子多不勝數，當中自己較為有印象o既有：蘋果將前查爾頓前鋒巴列特稱為「南非發哥」，意指佢o個樣同周潤發成個餅印咁。其實，已經相當啜核。另外，保頓o既迪奧夫因為鐘意向對手吐口水，所以香港部份傳媒又封佢為「口水王子」；不過，同圖右呢位名叫法迪加o既塞內加爾中場o既稱號相比，「發哥」、「口水王子」呢D朵都未係至爆。貴為02年世界盃塞內加爾主力，法迪加，o係香港又名「手痕中場」、「賊仔」。

xxxxxx

事緣呢位曾效力國米同保頓o既10號仔，o係韓國踢世界盃期間涉嫌同隊友偷左條值1200法郎o既頸鍊被當場斷正。後事如何我已經唔記得，但之後好一段日子佢被東方日報稱為「手痕中場」我就記得清清楚楚。手痕，意謂手多多，用o黎形容小偷含蓄得o黎又唔難明，當時小弟真係好佩服寫稿個位人兄點解會有呢下神來之筆，幫法迪加起個咁正o既朵。即使佢o依家已經完全過氣，淪落到英冠高雲地利，但我仍然記得呢位人兄。記得佢，唔係因為佢好波，而係「手痕中場」呢個花名。所以話，一個啜核o既花名，真係可以跟一個人一世，歷久不衰。法迪加遇著寫稿佬靈光一閃幫佢起呢個正到暈o既名，都真係好黑仔。咁就一世。

P.S. 別名「賊仔」係成報幫佢起o既。略嫌露骨。

(暫)一個人活

2007-07-04T23:20:00.000+08:00

我終於開始了一個人的生活。等候了六年的獨居生活。前期準備工作比想像中還要累人，很多的「第一次」都在這次搬家行動毫無保留地奉獻了。忙、亂、累、緊張等等因素都令原本復原得七七八八的皮膚再次壞起來，搬家的代價對我來說也真的不少。弄壞了外表，花費了金錢，換來較為自在和有私隱的生活，是一次等價交換。賺來的和輸去的有同等份量，打和。

xxxxxx

每日每天回來這個小小的借來的地方，第一件事想到的還是打掃打掃再打掃。以前由媽代勞的工序現在由我全數接收。很麻煩。這些不粗重但累人的工夫令我懷疑自己患了強迫症，掃來掃去都覺得地方不夠整潔，在某角落總會發現毛髮和小塵埃，打掃後總得再打掃。長此下去，再過一些日子我自覺自己有機會成為稱職的家務助理，做做兼職賺外快幫補租金。

xxxxxx

瑣碎的工夫令我實際可享受獨生活的時間不太多。一天大約只有個多兩個小時。數碼音樂的普及令買回來的音響組合長期閒置。一個月也買不到一兩張新唱片，在房裡用電腦播放下載回來的新音樂的次數遠比到「大」廳中播放以前剩下的舊唱片為多。畢竟大部份的作品我也聽得不能再爛。感覺一去不返。這情況和我當初予想的情況有點出入。數碼時代把我聽音樂的習慣漸漸地改變了。

xxxxxx

在未來的一段時間，還得繼續摸索屬於自己的獨居方式。高興地生活。

新玩具

2007-07-01T23:29:00.000+08:00

1984年4月出廠o既西門子攪盤式電話。記得以前屋企用o既都係行攪盤式，但就係個種全黑色大大部，外型有D似布甸狗個頭o既最傳統款式。無他，我好鐘意攪盤式電話沉甸甸笨重o既「體格」，鈴聲又夠實在，加埋感情分，令呢種早被淘汰既七八十年代產物係我心中既地位一直比擁有N種功能既新款電話為高。

xxxxxx

o岩o岩搵到呢部只比我後生兩年但狀態一流既老爺機，算係為近期忙到得閒死唔得閒病o既生活增添返小小樂趣。因為，我終於又可以聽到闊別o左十幾年既「呤呤」聲嘞。下一目標，鑽石牌掛牆鐘！

請將手放開

2007-06-25T23:20:00.000+08:00

臨近回歸十週年，政府和各大小傳媒既宣傳攻勢鋪天蓋地，夾硬營造一種普天同慶既感覺，但，撫心自問，又有幾多個土生土長既香港人真係會為「回歸」高興？回歸只係一個儀式，一個象徵，香港人生活一樣咁過。我唔明白點解我地既小政府同阿爺要搞咁多無謂動作，花咁多無謂錢去做呢場大龍鳳，迫小市民一齊慶賀。

xxxxxx

回歸，已經十年，但我同大陸既距離越黎越遠，講出黎自己都覺得黯然。其實，自細細個開始，直至出黎工作頭兩三年，我一直都好熱愛自己既國家同民族。五千年文化歷史，壯闊既美麗河山都令我為自己中國人身份而自豪。所以當時不斷搵機會去見識呢遍土地，幾年間一個人走遍半個大陸，目的就係想令自己為中國人呢個身份多一份認同。但，當人越大，心智越成熟既時候，對陰暗面既體會亦更深。工作關係，自己有機會經常同內地人交手，體會尤深。即使，到依家回歸已經十年，但我仍然可以好大膽咁講一句：大部份大陸人從來無當香港人係自己人。文化背景既差異、政府以黨行先，道德觀念行後既教育政策、以前既貧富差距、中國人狗咬狗骨既心態，種種原因令香港人某程度上無辦法同大陸人融合，即使十年已經過去，但大家始終存在一條小小既鴻溝。

xxxxxx

阿爺有眼見呢種情況。為左加快融合，阿爺強將大陸行既一套愛國教育放落香港，國歌狂播、國寶狂送。為既，都係每日每天提醒大家我地係中國人，要忠黨愛國，唔可以有異心。小動作多多，實在令我同身邊一班土生土長既香港人吃不消。我，好想愛國，但對一個貪污橫行，草管人命，道德完全淪亡既國度，我實在愛唔到。中國經濟一日一日咁好，但我仍然睇唔到我地既民族會有將來。我對共產黨一黨專政無異議，但一日政府唔重新搞好道德教育，改變成個社會為賺錢可以置人命不顧既風氣，呢個國家，我無法愛。而且，直到目前為止你都唔信我地無異心，又點叫我地信你？一段缺乏互信既關係，註定失敗告終。

xxxxxx

回歸十年，我無感覺，只想講一句，請將手放開。

《Send Away The Tigers》

2007-05-10T23:23:00.000+08:00

返晒黎。我最愛既樂隊Manic Street Preachers經過3年既低潮，07年終於元神歸位，帶黎呢隻爽到爆既《Send Away The Tigers》。

xxxxxx

重記得3年前既《Life Blood》令人好失望，當時感覺Manics不論形象音樂歌詞上都無晒火，十足十上左神枱既大band咁唔憂做，為交差而出碟。就算搵左老牌監製Tony Visconti幫手造歌都救唔到回晒塘既曲詞，結果呢隻碟賣得比上一隻「隨意發揮」既《Know Your Enemy》重差，個陣時連死硬派擁躉如我都覺得Manics已經走到盡頭係時候散band歸隱。

xxxxxx

眨下眼就過左3年，真係估唔到Manics可以再一次反底，重要係U型個隻。3年來同Manics既初體驗源於YouTube。一個月前係個度見到佢地既唱片公司放左新碟第一首主打《Your Love Alone Is Not Enough》既MV上去做promote，即睇。最先發現既一件事係，由95年《Everything Must Go》開始發福既James Dean Bradfield減左肥！雖然去唔返初出道時既瓜子臉口，但已經比之前十年型好多！！而且，佢重係呢個MV度著返佢地好耐好耐無著過既軍服！《The Holy Bible》時期既軍服！單憑呢兩樣細微野，真係感受到Manics知恥近乎勇返晒黎。呢首《Your Love Alone Is Not Enough》搵左靚聲后Nina Persson幫手，出名音域闊既JBD撞把聲清脆到爆既Nina出黎既效果只能用「一個字」黎形容：精彩。三分幾鐘既典型Guitar Pop加上弦樂襯底，呢隊先係九十年代中期狀態大勇既Manics。聽完呢首歌後對佢地隻新碟真係萬分期待。開心又興奮！

xxxxxx

前日，新碟終於入手。咦？乜封面碟名同封底track list入面既所有R字都reverse左既？呢個設計又係抄返《The Holy Bible》既concept喎，一模一樣喎，有D野！不過呢，入面10首歌(再+1首hidden track)風格就大致跟返95年令佢地打入流行範疇既《Everything Must Go》，再次強化弦樂部份既處理，亦多返D結他。呢個方程式令隻feel 華麗／企理好多，亦差唔多令每一首歌都有條件成為大合唱位既選擇。JBD既唱腔依然肉緊，佢今次亦唔嗇吝結他solo，track 9《Imperial Bodybags》入面JBD既演奏對聽足佢地十幾年既擁躉簡直係期待已久既甘露。大佬，你上一隻碟多返少少呢D solo我地就唔會剷到隻野飛起啦！至於Nicky 既歌詞水準就同之前差唔多，其實佢既歌詞一向都好穩定，好少會大跌watt，但比起佢95, 98同01年既input，今次就重差DD，不過問題唔大。

xxxxxx

總括黎講，呢隻《Send Away The Tigers》係藝術範疇上未必比得上同系既《Everything Must Go》及《This Is My Truth Tell Me Yours》，但商業角度上佢必定會成為Manics係二千年代最重要既comeback。試問一隻由十首3分零4分鐘既Guitar Pop組成，毫無冷場再加零實驗味道既專輯，有邊個會唔鐘意呢？加上本身樂隊積埋積埋既名氣同一首Hit到爆既主打，就算《Send Away The Tigers》上大碟榜榜首我都唔會意外，因為，從流行角度黎講呢隻碟可以話係無懈可擊，掂呀！

xxxxxx

推介曲目: 《Your Love Alone Is Not Enough》，《Indian Summer》，《The Second Great Depression》，《Imperial Bodybags》

xxxxxx

利益申報：

我鐘意左Manics超過10年，佢地隻《This Is My Truth Tell Me Yours》更加影響到我做人既態度(誇張呢！)所以，呢個所謂碟評有好重好重既感情因素係入面，唔好盡信。

xxxxxx

又，呢兩日我已經聽左隻碟5次。

孤獨探戈

2007-05-08T22:51:00.000+08:00

我覺得自己有病。

xxxxxx

作為一個sales，不論熟客定生客，我都好容易同佢地打開話題。由tony chan爭產到法國大選定係對方家事，只要客人肯講，我就有辦法將對話題延續落去。簡單D講，「長氣」係我可以o係sales行頭生存至今時今日既唯一「殺著」。如果唔係夠多口，估計自己已經俾人雞左廿世，依家可能唔係坐寫字樓嘆冷氣，而係o係欽州街做緊十零蚊一個鐘／斷order計既外賣仔，重要日日俾客「叉寧廚」常餐轉凍檸賓加幾多，外賣淨茶幾錢杯呢D騎呢問題度日。總之，直到目前為止，係其他同事眼中，我既溝通能力係絕對無問題。要乜有乜個隻。

xxxxxx

但，實情係有苦自己知。唔知係咪受工作影響，辦公時間以外真係完全唔想開聲講野。平時朝九晚六把口好似錄音機咁講唔停，左吹右吹又普通話又英文，有時都唔知自己講乜。要我non-office hour都要繼續做talk show真係頂唔順。所以，我好享受自閉既樂趣。因為呢種心態，搞到同朋友出黎飲兩杯，就算有新人參與，自己都係選擇坐埋一邊唔主動自我介紹，寧願等運到，奉行「有就有，無就無」政策。結果？你又無劉華／吳彥祖咁靚仔，你唔出聲咪唔好識囉。各有各玩。無癮。其實唔係唔想識多D新朋友，但真係唔知道點樣去激勵自己重新做人，主動D去識多D人，最近更加變本加厲，連朋友叫出去都詐病失場。感覺自己就黎變做一個唔識電玩既電車男。

xxxxxx

依家絕跡夜蒲，周末迷上踩單車。當然都係一個人進行。無辦法，身邊有時間既朋友無興趣，有興趣既朋友無時間。你問我灰唔灰，其實又唔會，一個人踩都有好處。當然有朋友一齊就最好啦。無都算數，自己又爭唔落，有機會識D志同道合既人既時候自己又唔識把握。事緣有好幾次o係路上俾其他單車友approach，約我一齊踩，偏偏係呢D時候自閉症又發作，對人愛理不理，你問一句我答一句行貨了事，講真我係車友見你反應咁冷淡心入面都會叫你fuck off。諗返轉頭自己都唔明白，點解做野個陣對住D客咁八面玲瓏，但私生活層面上識新朋友就咁失敗，完全發揮唔到自己係工作上既長處。真係失敗中既失敗！

xxxxxx

誠然，直到依家自己仍然享受一個人獨處，一個人踩車既時光，但長此下去真係好怕自己會變孤獨精。以前阿貓係度，唔會覺得留係屋企自閉有乜問題，但依家連佢都走左，有時真係會覺得悶。好快我就要開始獨居生活，唔知到時情況會唔會更惡劣。心入面好想改變目前既狀況，但，發覺真係有少少無從入手。原因？見到呢篇野入面有咁多個「我」字就知我有幾自我啦，自我既人性格最難搞！點改？

xxxxxx

話時話，有無人想同我跳返part孤獨探戈？

《Chapel Of Dawn》

2007-05-03T23:28:00.000+08:00

想讚讚麥浚龍隻新碟《Chapel Of Dawn》。王雙駿負責所有音樂，風格統一，D電子聲效又真係營造到陰陰沉沉既詭秘氣氛，比前年《雌雄同體》更神。同其他單位合作既幾首作品感覺都OK，尤其係track 1 X 草蜢玩既《亥時出世》，無論曲詞編加歌手表現都無得頂，比Juno X hocc 既《第三身》更切合隻碟既主題／形象。當然有人會覺得有錢仔玩音樂資源多人幾條街，想點都得，但，錢未必買到音樂品味／觸覺。白花油王子夠有貨，又唔見佢首《愛多八十年》洗甩陣娘味？今次我真係要撐Juno，呢隻碟毫無疑問已經進入我本地年度Top 5。水準高，音樂型。5星滿分既話我會俾4粒星。當然，有讚都要有彈，如果唔係鱔稿feel太重。少左個粒星衰係呢兩度:

1) 林狗既《成魔之路》remix破壞左隻碟既統一性。原本成隻碟好cool好型既感覺俾林狗好有火既演繹破壞晒，成個tune同隻碟唔夾。坦白講呢個版本唔做好過做。

2) Jame Jarvis畫既封面係好矜貴，但個人唔太喜歡。隻碟講既野幾有深度，十四五歲班細路未必會深究歌詞講乜，見到James Jarvis既封面已經買唔切。但年紀大D又唔識Jarvis哥個班，見到咁既封面真係會卻步，以為隻碟又係專攻無知少年既魚蛋情歌專集。自己唔清楚唱片公司既target age group係邊D人，但用個咁細路仔feel既封面去包裝呢隻「有D野」既碟好似浪費左少少。

無論如何，呢隻《Chapel Of Dawn》比香港其他主流大碟水準高好多好多，話香港音樂人淨係識做魚蛋歌既樂迷應該都可以收聲乖乖聽歌。由出道俾人寸到依家既Juno係時候拿返佢應得既credit。我撐你！

緣聚緣散

2007-04-21T23:31:00.000+08:00

4月21日，這天早上貓從診所出院。驗血報告顯示所有數據都比3天前好，情況樂觀。從家人處收到這消息，在外的我很高興，以為和貓還會有一段漫長的相處日子。

xxxxxx

下午7時，家人再來電，說貓突然全身抽搐數下後便斷了氣。上午報喜下午報憂，我以為這種晴天霹靂戲劇性十足的情形只會發生在電影裡，萬料不到今日我能「有幸」遇上。

xxxxxx

個人估計貓是受不了出院前接受的麻醉注射，已致身體有好轉下猝然而逝。當初我簽了聲明書同意診所對貓進行任何治療，沒辦法，但如可以重來我寧願不讓貓接受出院前檢查不看報告。悔不當初。

xxxxxx

家人說，貓回來時眼睛都是藍色的，原因是麻醉藥上了眼睛。回到自己的家，牠混混沌沌、有氣無力地在家繞了一圈便躲到廚房，一聲不響地發呆，直至離開為止。雖然老土，但我也還是要說，我的貓很有靈性很懂事。

xxxxxx

人走茶涼。再說甚麼也是徒然。讓我安慰的是，貓最終能回到自己的家安息，不用「客死異鄉」；可悲的是，至離開前，牠已經整整一星期不能進食，最後要餓著肚子上路；遺憾的是，貓走時我不在牠的身邊陪伴。雖然，在留醫期間貓好像為了我丟牠一個到診所裡而生氣不理我，但我想貓仍會願意在臨走前看見我的。可惜事與願違。這次錯失或許會令我抱憾一段很長很長的時間。

xxxxxx

無論如何，可見的一段時間都不會再養貓了，因最好的貓我已曾經擁有。

P.S. 因為貓，我不會再刪掉這個blog。當是留給自己留給牠的一點點紀念。

離別的時候

2007-04-18T21:08:00.000+08:00

我家有一隻8歲大既花貓，自99年起佢一直係我家既一份子。朝夕相對，每日收工入屋見到佢訓係飯桌度已經成為一種習慣。當一個你每日都會見到既人/物消失係你生活圈子入面，老實講，個種感覺話唔難受就係呃緊你。

xxxxxx

記得阿貓係o係99年7月3日黎到我屋企。當初見到佢既火柴身型、尖咀臉相，第一個感覺係覺得佢超樣衰。連摸都唔想摸。而佢頭幾日都好怕我地一家人，匿係椅底唔出黎，重賴埋屎，個野真係想鬧我老豆做乜拿隻賴屎貓返黎。驚左幾日阿貓始終難敵肚餓，最後都係俾貓糧乖乖引出黎開餐。重記得佢嘆完第一餐後就爬上我哥張床度大模斯樣訓覺，正宗小朋友。一個樣衰既小朋友。

xxxxxx

不過好快阿貓就俾我地養到肥肥白白，開始有福相。原來肥左既佢都好靚仔，鼻哥夠紅個頭又圓，家貓中佢肯定算係型英帥個隻，家人亦漸漸對佢充滿好感。可惜為左阿貓既健康同安全，我地係佢一歲時送左佢去做絕育手術，令佢無緣外出勾引千千萬萬既雌貓做其萬人迷。此舉人道與否見仁見智，但外面世界太多危險，我地實在唔捨得俾佢出去搏命。寧願佢晚晚訓我大脾好過。

xxxxxx

03 年，4歲既阿貓遇到人生第一次意外: 由我家直墮一樓平台，導致一顆牙齒飛脫，膀胱爆裂。經手術後總算搶救過黎，而佢亦變得比以前細膽，爬窗同雀仔鬥快情景亦不復見。講起黎好奇怪，雖然我親眼見佢飛墮落樓，但就無個種「將會失去佢」既感覺。當時我好強烈知道佢唔會死，縱使，個度有成6層樓高。

xxxxxx

07 年，阿貓8歲。踏入老年期，佢活動能力已經不復當年，一日大部份時間都係打坐同閉目養神。而我地亦已當佢既存在係一種習慣，無左當年對佢又摸又搓既熱情，任由佢隨便休息。有時佢心情好都會爬上我大脾做大爺，我亦由佢，反正一切已成習慣。

xxxxxx

可惜，好景突然完結。10 日前，阿貓開始食慾不振。原本以為佢係沖完涼有少少唔舒服，休息一兩日會無事。但情況持續惡化。4日前已經食唔到野，只可以飲水。我屋企個o個乜都扮識但既老豆堅持阿貓臉色有好轉，唔使睇醫生，我錯信佢。昨晚，阿貓已經虛弱得去唔到廁所，訓係椅到就賴尿。情形惡劣，我決定今日帶佢睇醫生。

xxxxxx

好記得野性既阿貓從來都好抗拒入籠。琴晚，佢賴左尿後，有氣無力咁入左我間房，走上張床度休息(污糟都唔緊要，見佢咁樣邊可能阻止佢)。見到佢瞳孔放大兼無神，個一刻我直覺今次真係會失去佢。我好傷心。拿起個籠我同阿貓講「你乖乖地入去訓，我聽日同你睇醫生。」佢真係好安靜咁自己行入去。以前，佢係打都唔入去。咁證明左D乜野呢？會唔會係佢都知道今次佢過唔到呢關？見阿貓係籠入面幽幽咁望住我既眼神，個一刻除左悲從中來之外都諗唔到更好既形容詞。同佢相處左8年，坦白講突然失去佢我會好傷心好傷心，8年太短。同時我亦唔想睇住佢受苦。但此時此刻除左摸佢之外真係無野可以做到。一宵無眠。

xxxxxx

今日，阿貓證實患上腎衰竭。無藥可醫。見佢係診所接受檢查時受驚掙扎，咬親自己條脷而成口血時，我真係想返返轉頭唔帶佢出黎(但唔帶佢睇醫生佢會更痛苦)。當然，自己無好好係診所安置阿貓令佢受驚，係我既責任。好後悔，非常後悔。依家留左佢係個邊吊鹽水，化解積存係體內既毒素(尿素超標四倍，我後悔信我老豆，應該一早要帶阿貓出黎)，其實只係治標既方法。醫生有建議俾阿貓安樂死，問心個句實在唔捨得，但我知呢個對佢係一個最好既解脫。我唔望有乜野神跡出視，依家考慮既係想阿貓走既時候舒服D............幾日無食野既佢已經瘦到不似人形，我想佢離開前可以過得好少少，唔好做隻餓貓。

xxxxxx

或者好快我就要同阿貓離別，佢離開之後我相信自己有一段時間都唔會再養貓。離別從來都係傷感，但生命就係等待死亡既過程，無得閃，無得避。希望若干年後自己可以笑笑口去面對呢件一次又一次重覆既過程，無需再那口那面。

xxxxxx

貓，多謝你。

藉著個扑說說理

2007-03-26T22:31:00.000+08:00

做人有時都好矛盾。

xxxxxx

經常同人講，自己對工作有一定抱負，好想繼續往上爬，但心入面知道自己其實對打工越黎越心淡。相比以前既好高鶩遠，依家既心態係無左初出茅蘆，遇神殺神個團火。

xxxxxx

唔係變左做老油條，甘心每個月賺兩萬印印腳過日辰算數；亦唔係個種日做夜做狂儲錢，想盡快自己行出黎做老細唔受人氣既進取人仕。有時，都唔知自己想點。

xxxxxx

今年年頭，睇左史泰龍重出江湖之作洛奇六。洛奇一二三四細細個既時候已經睇過，以前年紀小對當中既含意唔清楚，淨係覺得龍哥生吞雞蛋、下下俾塊面人打好型好威；但大個再睇返，知道當中老掉大牙既奮鬥道理就好激動。黎到最後一個series，龍哥身型面貌雖然慘不忍睹，但故事本身好紮實好有感染力，睇完套戲不期然令自己重新諗起以前一直想做但唔敢做既念頭。龍哥話，無人能夠阻止自己做鐘意既事，只要心入面重有一頭野獸，年齡或者其他客觀因素唔會係一個障礙。呢個訊息老土得黎好到肉，尤其係出自呢個有血有肉，存在左三十年既角色既口中，呢下真係俾佢深深咁打動左。

xxxxxx

究竟自己想要乜野呢？

xxxxxx

其實，本身真係唔願意自己既年青歲月就咁係工作中度過。父母俾左一副尚算健康既身體俾自己，如果白白讓時間糟蹋佢，到死個日真係會後侮至極。一直以黎有一個小小既願望，其他人或者會覺得好幼稚，但自己視佢為廿幾年黎最重要既事：好想黎一次艱苦既長途單車旅程，試一試自己既意志同體力，睇下呢個就快崩壞既世界。唔知算唔算奢侈、幼稚，只知道不趁自己年輕時實行既話，將會抱憾終生。

xxxxxx

最近呢個願望越演越烈，連帶影響工作情緒。是好是壞真係唔識講。有一樣野比較明顯：就係自己踩車時既態度比係寫字樓時集中、專業得多。頂唔順要問自己一句：大哥，邊份先係你正職呀？

xxxxxx

越講越迷失，只好藉著個扑說說理。

爛尾斯國遊記之一

2007-01-31T22:57:00.000+08:00

12月尾去左9日斯里蘭卡。其實主要都係想睇下島國風景同呢個被古代中國人稱為「獅子國」既古城遺跡。朋友同事知道我要去呢個曾飽受海嘯同內戰摧殘既國度都給予我衷心既祝福，以為我會一去不返。係呢度我要多謝佢地既關心，順便抽下水先：有時新聞上睇到既野未必係全對架！斯里蘭卡其實超級安全！

12/22 星期五夜機出發。停新加坡一日。熱到嘔，悶到暈。下次有人請先會再去呢個地方。

12/24 零時到達科倫坡。發現當地人英文水平極度不濟，康講男要同佢地溝通唯有「手口並用」。12/24宿Negombo，但到達時間太夜，預先訂好既賓館關左門訓覺。好彩撞正平安夜個邊有party，所以點幾兩點條街都重有好多後生仔，個個見到貌似走難既康講男都連聲hello，非常友善。經過一粒鐘努力，最後以rip-off價宿某靚靚guesthouse。惜其金玉其外敗絮其中，三點幾鐘竟然停電，令康講男成為斯里蘭卡特產 --- 隻隻似鼻屎咁大既雌蚊既深夜食糧，全身被瘋狂襲擊，保守估計失血超過20 cc。:P

12/24 清早返回科倫坡搭長途巴士上山城Kandy。4小時車程盛惠80 rupees，抵到爛。不過巴士嚴重超載，無冷氣加上攝氏三十幾度既天氣，車廂入面都有少少惡臭。既為車廂內唯一黃皮膚人種，成為異類係理所當然，全程康講男被幾十對友善既眼光緊盯，此時此刻港男覺得自己係梁朝偉，吸引力爆燈。不過，人太多就累到有位坐既康講男個頭挨左幾下斯里蘭卡式肶爭。痛到飛起。最正既係捱肶後得到行兇者仔細闗懷，含羞嗒嗒地輕輕撫摸康講男既頭顱，電影感及斷背感十足。係路上港男第一次親眼見到動物園外既大笨象。係斯里蘭卡有D大笨象係俾人養黎做野，負責搬運重物，就好似香港既拖頭咁。港男係4小時既途程見到三至四隻，可惜既係車廂內人太多無辦法影到相。見到working elephant 心情都幾激動。畢竟係條公路度見到有隻咁大既野行黎行去都係第一次咋！同埋個樣都好善良。可以既話好想餵佢食香蕉！

12/24 約下晝四點到達山城Kandy。全身散晒。入住預先訂好既賓館Kandy View Guesthouse。

爛尾遊記第一篇完。

註：圖片攝於斯國南部城市Matara附近。海嘯期間呢度都遭受好大程度既破壞，旅遊業到依家都未恢復，好大鑊。真心講句，斯里南卡南部既風景唔會比任何一個東南亞／太平洋島國有既差。佢缺既只係[正面]既宣傳。外間俾呢個國家太多負面評價啦。

跳播 --- 小春扮大袋

2007-01-13T21:15:00.000+08:00

放完長假返黎忙／攰到趴街，斯里蘭卡遊記拖住先。

出黎撈有時真係好身不由已。康講男本身都老老地開始唔多鐘意蒲，奈何身邊豬朋狗友個個精力旺盛，一晚連踩三場當閒事。雖然已經跟寶寶龍學識左講「唔好」，但講男一個月都重係要應酬兩三次聯絡下同豬朋們厚過岡本0.03既感情。

xxxxxx

講男開始謝絕夜蒲，表面原因都不外乎三樣野: 自己老餅，音樂悶，人流複雜。第一樣就唔講啦，個個場(油尖旺不在此列)播D歌都係咁上下，let get it started, drop it like it's hot, don't cha, yeah，都已經有好長一段時間無乜點變，講男都就黎識唱變做mc jalu。個個星期都係播呢D歌去黎都唔知做乜，我係屋企播都得啦！而且人流越黎越複雜，係某D所謂大場我重feel到有好重「professional」既味道，越黎越多自由人黎搵食～

xxxxxx

不過問心以上原因2 out of 3都係講男亂吹出黎。真正令講男對clubbing卻步既原因係夜場入面太多傻仔扮大袋。有D人講男都唔明佢地D心態，以為出入中環就高人一等，一入夜場個鼻即刻大過成龍，講野寸寸共眼神惡過大傻，個個都以為自己係霍英東個孫。但講男極度懷疑呢D忽然大袋既高貴人種其實日間係o係各大中小企入面每日都俾人屌到撻皮既小職員，每個月二十號開始就要同糧尾搏命既星斗市民一名。可能佢地有幻想症，一到星期五／六晚黑就會以為自己係夜場貴公子，有錢又有面，擺個款出黎要夠寸先得。對住呢D為數咁多既柒頭，都真係幾灰，叫人邊有心機去玩呢？

xxxxxx

其實，所謂clubbing只不過係娛樂一種，佢並唔係俾你去充大頭鬼既活動。有錢既咪去members-only既會所，手緊既落油尖旺細場亦無不可，總之豐儉由人。大前提係唔好下下係陌生人面前起晒鋼扮晒高貴，擺副囂屎樣出黎以為自己好型好掂，老老實實娘娘地囉。去clubbing無非都係聽下歌un下識下女，享受氣氛架嘛，連出黎玩都紮行晒馬，不如留係屋企睇星矢！多餘。

xxxxxx

展望07，講男要同夜場貴公子講byebye。

Sri Lanka Dreaming - Preview

2007-01-01T11:12:00.000+08:00

writing this message in Changi Airport in S'pore in exhausted situation. After spending 9 days in Sri Lanka it's time to write something about this 'finest island' in the world.

N.B. hope i can arrive at HK without any trouble. I am gonna die on the plane if I keep my eyes open.

it's just sweet....whistle for the choir

2006-12-05T09:42:00.000+08:00

Well it's a big big city and it's always the same
Can never be too pretty tell me you your name
Is it out of line if I were so bold to say "Would you be mine"?
Because I may be a beggar and you maybe the queen
I know I maybe on a downer am still ready to dream
Now it's 3 o'clock time it takes for you to talk

So if you're lonely why'd you say your not lonely
Oh your a silly girl, I know I hurt it soIt's just like you to come
And go you know me no you don't even know me
Your so sweet to try, oh my, you caught my eye
A girl like you's just irresistible

Well it's a big big city and the lights are all out
But it's much as I can do you know to figure you out
And I must confess, my hearts in broken pieces
And my heads a mess
And it's 4 in the morning, and I'm walking along
Beside the ghost of every drinker here who has ever done wrong
And it's you, woo hoo
That's got me going crazy for the things you do

So if your crazy I don't care you amaze me
Oh your a stupid girl, oh me, oh my, you talk
I die, you smile, you laugh, I cry
And only, a girl like you could be lonely
And it's a crying shame, if you would think the same
A boy like me's just irresistible

So if your lonely, why'd you say you're not lonely
Oh your a silly girl, I know I hurt it soIt's just like you to come and go
And know me, no you don't even know me
Your so sweet to try oh my, you caught my eye
A girl like you's just irresistible

阿生，你有型又靚仔。

2006-09-10T22:43:00.000+08:00

原來到依家都重有好多人用「MK人」去形容班旺系人仕，當然班友係爭唔落，著衫浮誇又老土，但當有D契弟發展到連「嫌疑MK人」用一個名牌銀包都要寸人「原來MK仔都會捨得晒錢買名牌」，講緊既已經唔係針對人地既衣著，而係係度比身家。

xxxxxx

有人講得好，香港最興既唔係hip hop 碌、細身碌，而係「銀紙碌」。一身名牌著上身就為之型，唔使講究襯唔襯自己，總之show到自己財力既碌就係「近」。所以你可以係街見到全身bape或者耳戴鑽環心口大大條金鍊既「百萬少年」，撇開尊容唔講，成副架生真係好嚇人架。當然臭朵男都俾佢地嚇窒左，點解真係會有人捨得俾差幾買對祖國製兼抄AF 1既垃圾鞋架呢？有銀紙都唔係咁玩啦。

xxxxxx

女OL個個要LV 姑池晒行頭，依家發展到連中學生都要一人一隻Porter、Burberry袋返學先叫威。真係好驚呀，呢頭報紙先賣D貧苦狀元點樣自學成才，唔靠天王唔靠雞精書考入名校，個頭有D鳩毛都未出齊錢都未識搵既學生問「$1,500可以買到乜野袋返學」，大家都係學生者，乜貧富懸殊得咁緊要？一隻porter袋係咪可以換到幾個A或者醒目D既頭腦先？計我話呢班二世祖有錢都唔應該買名牌，俾錢換左個腦緊要好多囉。

xxxxxx

所以話，乜野MK仔,　尖咀碌，銅鑼灣碌呢D terms基本上都係晒氣，講黎講去咪又係用錢堆砌「自我」出黎。你幾時聽過有人讚一個一身平價品牌既人有型又靚仔丫？想要型呀？買名牌啦唔該。

我有文化，有理想，不過無錢開飯

2006-05-28T19:11:00.000+08:00

有D仆街，成日自命文化人，狗眼看人低，好多事係佢地眼中都係「悲劇」，不可理喻，乜春都睇唔過眼，係佢地圈子外既朋友都係無文化，無理想。呢D人如果俾我係街見到一定學Uncle Bus咁大大力屌佢老味。

呢期Uncle Bus紅，又有好多「文化人」借題發揮玩批判搏出位。其中有條仆街話成件事係康講既悲劇，原因係其他乘客態度冷漠，袖手旁觀任由阿叔作惡欺負四眼青年云云。呢D撚樣就單一事件上綱上線老屈康講人，照計應該拉佢出黎遊街示眾。大家睇野有時可唔可以用別人既角度去諗呢？當時Uncle Bus躁到咁，是但一個路人甲插咀情況可能重衰，到時好難擔保成齣大龍鳳六分鐘可以收科。「文化人」淨係識馬後炮，呢樣唔岩個樣唔著，借巴士阿叔踩康講人，正陷家產。我又真係幾想知，如果佢當時都係架巴士度，又係咪真係會咁見義勇為差隻腳埋去幫手。又，你批判都唔緊要，但唔該做好資料搜集先，連四眼仔個名都寫錯做Elvis，好心就咪撚出黎襯啦，文化人！

其實，臭朵康講男經常懷疑，呢班有文化有理想既高貴人種，咁憤世嫉俗，諸多意見，成日寫呢樣寫個樣搏出位，查實，係咪等錢洗？我印象中搵到食兼有料到既真文化人唔會咁「積極」咁「多產」架喎！你地咁勤力，我直覺覺得你地無錢開飯趕住上位搵錢咋喎，「文化人」們！唔該收皮啦！

xxxxxx

臭朵康講男呢度唔歡迎任何同佢唱反調既人，覺得唔岩聽唔岩睇既唔該拿拿臨過主。

粉絲當魚翅

2006-05-28T18:29:00.000+08:00

有D全霉好撚好笑，成日扮晒高級扮晒有人文精神，芝麻綠豆濕碎野當做大事件，多方位繪形繪聲作全面報導，內裡當然唔少得文人自瀆式長嗟短嘆，又呢樣又個樣，務求令寫o個個肉麻，睇o個個作嘔。最仆街係經常失實地描述事物，童子軍係佢地筆下會變成飛虎隊，濕鳩舖頭變潮流基地。總之間全霉以為有人文精神做包裝就可以任佢寫，屌你啦，你地真係當班讀者低能架咩！成日粉絲當魚翅！

好記得有一期人文精神代表以廣州作專題報導。D記者唔知係咪成日屈係東區少返大陸，搞到視野特別狹窄，又成日用自己套「我城」標準去判斷事物，小小野就大驚小怪，發現一間裝修型D既boutique就將佢捧到上天，連個門口個草地都拿黎講，誇張到話條入口小直路似貓步天橋，康講好難搵到類似舖頭云云。好彩臭朵康講男成日跑大陸，親身去過驗證，如果唔係真係俾人文精神代表大到。係，間舖頭裝修係好正，但個草地垃圾處處，雜草叢生，完全缺乏美感；門口小直路直線距離一定唔夠俾人行貓步，無去過既人唔本俾本野用廣角鏡攝影效果暪騙到。不過人文精神代表都唔係第一次，基本上做得佢地封面既都只不過係雞毛小蒜小事一椿，只不過係有心人們將佢地無限放大以滿足佢地既「自瀆哀傷情感」。

如果可以既話，臭朵康講男想佢地正文同副刊內容分家，無謂要人睇一次屌一次。

xxxxxx

臭朵康講男呢度唔歡迎任何同佢唱反調既人，覺得唔岩聽唔岩睇既唔該拿拿臨過主。

我有壓力，你有壓力，你做咩挑釁我呀？

2006-05-20T00:16:00.000+08:00

做sales，一d都唔似路人甲睇得咁風光咁好做。有d白痴兒話sales唔使點做d單已經自動送上門，每個月印印腳做夠數又穩袋老com去蛇王。見到呢D低級趣味，臭朵港男要講句，喂，我頂你呀，有單之前sales對客做個二十萬樣工夫你估流架？淨係要媾掂個客信你呢一環已經難過落中環搵女過夜啦。同公司D老屎忽搞好關係幫你插隊呢？唔使做架，D人會自動同你friend架？你以為自己係陳冠希余文樂咁型英帥逢女埋身呀？咪又係要低聲下氣求同事幫你手攝個好位早日出貨埋deal，呢D task你估真係易架？面皮薄D都做唔掂啦！價錢呢？唔使做market research慢慢鍊價架？亂咁報都會中架你估？十九幾樣野做得好再加運氣先有機會同客做到deal兼長拍，往後又要保住個relationship，當中辛酸苦過梁天來，等D痴線兒以為Ｄ客同單真係會係棵樹度跌落黎！都低低地！

重有，sales同老細交待既難處痴線兒們你地又知多少呢？交到數，係應份，單，永遠只會嫌你做得少而唔會讚你overload，加quota，係「對你能力既肯定」，到唔到貴客自理。交唔到數，就日日當你政治犯咁捽鳩你係你身邊依依哦哦，直頭煩到想伸手抱住佢一齊跳樓一鑊熟個隻。呢D俾人屌到撻皮兼面色慘白自信插入谷底既時候，又有邊個會感同身受呢？係啦喎，做sales有數就可以惡過老細？你思想都幾天真無邪兼玉潔冰清！

所以話，每個位置都有著有唔著。永遠唔好只睇表面開口埋口羨慕阿豬阿狗搵得多做得悠，箇中苦處只有當事人先會明白。想搵多Ｄ錢就唔該自己諗諗計，淨係識得睇人富貴有春用，妒忌人就更加唔可取，講黎講去自己唔發奮come on let's go就唔該收聲。要明白，無憑行動驗證過真理既人係無發言權架！

最後，等我學皮蛋黃講句：痴線兒們，工作就是這樣的！我有壓力，你有壓力，你做咩挑釁我呀？

亞武

2006-05-06T09:12:00.000+08:00

鄧伯話，實踐是驗證真理的唯一標準，臭朵康講男身體力行做到了。

五年十二份工，最短兩個禮拜，最長年幾，份份工似project based多過perm.，康講男轉工頻率拍得住十八廿二年青淫換畫速度。無論跨國巨擘定中小企定一人公司，康講男全部逐個擊破，不斷轉不斷試，用左五年時間終於驗證到一個真理：康講男爛泥扶唔上壁，一定要做濕鳩細野先會自我感覺良好兼有所作為，否則只會霉到趴街，尤其為充斥大量異性既MNC服務既時候。

想當年日X日恨做大MNC，主觀希望出入甲級寫字樓，身邊索爆同事團團轉，收工蒲吧玩天光，淨係諗都開心到死。屌那星，但原來現實係好撚殘酷，係，MNC係有好多索女，但從來唔會o係你個dept.度，所以永遠都係有得睇無得識。根據自己既MNC歷史，係臭朵康講男身邊既同事超過八十七點六都係正值狼虎年華之女性，佢地都有一個共通點，就係擁有一條好深既溝，代溝。唔好睇少呢條溝，唔知幾多後生仔就係俾佢「乙水」仔浸姣龍，對住蘋果讚橙好，結果被暗地祭旗。康講男後生時柒下柒下，又點會避得過呢D事呢？我的MNC歲月，只係另一個職場殘酷物語。

濕鳩細野，無靚女，無福利，算。至少唔使諗點填溝，唔使掩住良心讚班狼虎高層個樣後生，工作能力拔群等二十萬樣言不由衷既低級趣味。公司細細邊個係新奇士邊個係潮州爛柑老細一眼睇晒，安守本份人工自然升得快，淨計帳面其實唔會差過MNC，當然包埋隱性factor就無得比。但今時今日臭朵康講男淨係想快D搵返舊錢出黎再次告別打工歲月。所以，唔Q理係灣仔三十年樓齡等收購大廈定係深水埔街邊地舖，有奶就是娘，俾得起錢我就幫你搵生意，認你做大佬！但你夠膽俾少一蚊我就一野蹺起你，認錢唔認人！

我，要錢！

雞潮

2006-05-03T22:40:00.000+08:00

我身處一遍雞海入面。由油麻地臨時熟食街市到廟街美都餐室，上天下地都係雞。當中，有肥有瘦，有高有矮。有超級波霸，有絕版微波；有濃妝艷抹，有鄰家素顏。有老，無嫩。總之，映入眼簾o既，都係一隻隻由內地輸入本港保證無禽流感但可能有暗病o既走地雞。

雞潮入面有一個個無懼禽流感威脅依然力撐活雞好味道o既食家。上天下地都係雞造就呢班花甲食客一眼關七o既好本領。死亡彎角有北記，老廟公園現陀地，通通逃唔過呢班長期係大街小巷企定定睇場o既地膽們之法眼。每次見佢o地耳掛earphone扮作保護政要組咁監視走地雞一舉一動，我都深受鼓舞。都話香港人至叻，唔使靠人樣樣靠自己。睇下佢o地，揀雞全憑自動波，唔使爸爸彈次貨。我，為食客們喝采。

為應付五一黃金週，有關人仕決定增加走地雞流入本港之數目。今日所見，活雞流量激增。由於質檢人手緊張，致令輸港之走地雞質量進一步下跌，老雞，家鄉雞數目大幅上升，味道遠遜從前。據現場所見，食客們眼見黃金週輸港活雞之質素無不皺眉，部份並聲言轉往別處覓食作抗議。供過於求，走地雞有難了。

面對每日每天沒完沒了o既雞潮，有人歡喜有人愁。我，今晚對老母整o個隻白切雞食不下嚥。

雞，真的太多了。

愛的教育

2006-04-27T23:52:00.000+08:00

香港D愛國教育水準差過宣傳易。每次搭巴士見到兩條o靚仔潮爆上演愛國短劇，我都有衝動上前鋤爆個芒。

個廣告真係垃圾都喊。首先，兩位主角人仔細細但已經發出幽幽之斷背feel。斷背位包括於街角互相談心並搭膊鼓勵。鼓勵，唔係錯，但握晒手搭晒膊頭懶係「舊朋友，心緊扣」咁真係80's到爆，o係今時今日兩位同性行街睇野都會被形容為斷背同行o既年代，重硬銷情義兩心知，唔俾人笑到仆街至奇。

其次，故事描述潮爆主角去黃埔軍校受訓後，愛國細胞即時萌芽，至爆場面係佢著住一身迷彩軍服上台致詞，口口聲聲受祖國美麗河山感動，願意全力保家衛國，重要扯到行極其雄壯地咁講句「生係中國人，死係中國魂」，慌死觀眾唔知套片係愛國truman show，屌，稍為對康講人有認識o既都知土炮，尤其係十幾歲o靚仔唔會咁撚老土地愛國啦，死係中國魂，呢句野我諗得汪阿姐先夠膽講，要十零歲o靚仔講出口？節省少少啦！

鐘意用pat思考既高官們話康講人愛國意識不足，所以呢幾年狂泵錢搞promo，睇黎，D錢都係白花。梗係啦，請埋班無蕉蕉既創作人搞埋呢D爛過豬咪咪牙醫廣告o既愛國短片，唔趕客至奇！愛國，如果係玩傳銷式洗腦hard sell就得，康講就唔會咁多偽民主棍啦！

出o黎行梗係要有L．V！

2006-04-25T21:17:00.000+08:00

係。我眼紅你。我無錢買L．V。所以每次見到潮爆康講男女拿住碌柒千蚊一個o既袋好有自信咁縱橫大街小巷，我真係覺得你地好撚型。

買LV，唔係罪。但可唔可以換一換個碌先拎個袋出o黎獻世？著對百零蚊cons，襯條洗到甩晒色拖到褲尾爛晒之W記老牛，wear wear地cheap tee一件，成身霉過隔離街燒臘舖阿陳，偏偏拎個碌柒千蚊袋袋上身，係咪玩五窮六絕七翻身先？真係型到我想笑。

有D潮爆康講男女就係咁。搵o個雞碎咁多，平日扒王之王都唔捨得去，寧願冒霍亂風險食十蚊走私燒味飯，死慳爛慳就為買個碌柒千蚊靚袋袋。好啦，俾你恨到啦，但同時又唔捨得(或無錢)upgrade周邊裝身設施，霉霉豆豆出街，搞到人人以為潮爆男女拎商業城A貨，咁有乜謂呢？與其扮大袋，不如將舊錢平均用係其他部份度，偏偏潮爆講男講女唔like，「出o黎行梗係要有L．V啦！」，吹呀？

百家爭鳴

2006-04-19T16:28:00.000+08:00

康講D八卦雜誌依家全面「夜遊王」化。呢邊豬皮姣吹肋底毛配男優正面半裸照，o個邊雞姐飛釘煮飯仔配啜爆親熱相，要幾咸有幾咸，去報紙檔睇封面好過捕o係砵記死亡彎角等運到。唔知有雞定有蛋先，總之有乜o野讀者就有乜o野雜誌，o既然係咁，我主觀希望遲D八卦雜誌會開埋三沙遊樂指南呢條水，等廣大讀者知道邊幾個場係鐵竇，邊幾個場有空中飛人玩，一家便宜兩家著，「保障公眾知情權」時又可以吸引骨場落廣告賺返筆，橫掂都係「夜遊王」化點解唔玩盡D喎，你睇依家D古惑漫畫都落晒露點指壓咸濕電話廣告啦，你班康港全霉乜咁背唔拿拿聲跟足條form去玩，第時跌書唔好怨人呀。

有樣o野唔明。早幾期你o地賣銀行OL日頭端莊夜晚淫蕩任人摷同公眾知情權有乜關係？人o地唔係公眾人物，斷估做乜都唔關我地呢班蛋散事掛？唔通OL打份朝九晚五寫字樓工都要刻己守禮唔可以行差踏錯教壞細路？最搞o野呢D芝麻綠豆「新聞」都可以擺上封面當勁料，全霉公信力同言論自由都真係個頭近。橫死掂死，唔該繼續大大力侵犯康講人私隱，等飲香港水o個條友開你地刀o個陣都可以講句「是錯對也不枉過！」時我上香都上得大注D。

越大越有機

2006-04-18T13:44:00.000+08:00

依家D康港全霉，唔似係咪上得深圳多搞到諗野都似生殖器咁側埋一邊，祖國五千年偉大思維好o既唔學壞o既就學到青出於藍，幫自己友臉上貼金完全唔知「醜」字點寫，要面少少o既睇到都笑甩轆。本地明星仔係佢地筆下會自動升格成亞洲或者國際巨星；碌拎叻少少o既就化身保齡球王子；起楝野高少少大少少就係超英趕美，唔係世界第一都係第二。總之花臣多多，好似小學生咁，今日鬥老豆老母做乜工聽日鬥搵錢多，好有意義，但低能到喊。

不過，最爆既係，王甘保原來係「亞洲車神」、「單車天王」，個朵，笑死我。

低鳩能。

2006-04-17T23:32:00.000+08:00

過氣飛魚幫大米賣平面廣告，宣傳口號曰「引發全申力量」，配合飛魚賣背求榮大隻碌，左手托住碗飯，看圖識字，照估計佢意思係食完碗飯就應該會有全「申」力量，有力量就可以好似飛魚咁，溝女換畫，無難度。

搵食艱難，幫莘莘學子補習要扮明星仔加CG特技已經夠爆，估唔到依家賣米都要玩到咁後現「袋」。下次，重有乜野「手羅」出o黎襯？

i'm your friend, 我點會呃你o者？

2006-04-16T22:55:00.000+08:00

「i'm your friend」係我有生以來聽過最爆既sell客金句，所以我要用佢o黎做扑名，希望幫始創者將呢句o野發揚光大。

做sales，真係要面皮成尺厚o架！信我，對住素未謀面聽筒中o既佢你都夠膽講呢句野o既話，你，做硬白金代表。

i'm your friend

愛在地球毀滅時 (置頂)

上海，上海

唉

百年一遇的〈自瀆〉天才

榛子回魂

帶我看齣戲

誰命我名字

大城小事

永遠等待

信不信由你

我會選擇「師」

門是關了，但窗口仍然打開

Femme Fatale

前程錦繡

時光，是對的沒說謊。

我真的受傷了

我找到了

舊碟新說 《Liberation Transmission》

臭朵

(暫)一個人活

新玩具

請將手放開

《Send Away The Tigers》

孤獨探戈

《Chapel Of Dawn》

緣聚緣散

離別的時候

藉著個扑說說理

爛尾斯國遊記之一

跳播 --- 小春扮大袋

Sri Lanka Dreaming - Preview

it's just sweet....whistle for the choir

阿生，你有型又靚仔。

我有文化，有理想，不過無錢開飯

粉絲當魚翅

我有壓力，你有壓力，你做咩挑釁我呀？

亞武

雞潮

愛的教育

出o黎行梗係要有L．V！

百家爭鳴

越大越有機

低鳩能。

i'm your friend, 我點會呃你o者？

舊碟新說《Liberation Transmission》